ఎన్నికలంటే వైసీపీకి భయం, కేసులతో అడ్డుకునే కుట్ర: పల్లా శ్రీనివాస్

ఎన్నికలను ఎదుర్కొనే ధైర్యం లేకనే వైఎస్సార్ కాంగ్రెస్ పార్టీ (వైసీపీ) కేసులు, వివాదాలతో స్థానిక ఎన్నికల ప్రక్రియను అడ్డుకోవాలని చూస్తోందని తెలుగుదేశం పార్టీ రాష్ట్ర అధ్యక్షులు పల్లా శ్రీనివాసరావు విమర్శించారు. ఒకవైపు క్షేత్రస్థాయిలో ఉద్రిక్తతలు సృష్టించడం, మరోవైపు వాటినే సాకుగా చూపి న్యాయస్థానాలను ఆశ్రయించడం వైసీపీ ద్వంద్వ వైఖరికి నిదర్శనమని మండిపడ్డారు. ప్రజాక్షేత్రంలో ఆదరణ కోల్పోయిన వైఎస్‌ జగన్‌, కోర్టుల ద్వారా ఎన్నికలకు ఆటంకాలు సృష్టించాలని ప్రయత్నిస్తున్నారని ఆరోపించారు.

సోమవారం ఆయన మీడియాతో మాట్లాడుతూ.. స్థానిక ఎన్నికల ప్రక్రియకు ఆటంకాలు కల్పించేందుకు బీసీ రిజర్వేషన్లు, ఎస్‌ఐఆర్‌ వంటి అంశాలపై వైసీపీ దాదాపు 60 పిటిషన్లు వేసిందని పల్లా ఆరోపించారు. ప్రజల వద్దకు వెళ్లి మద్దతు కోరాల్సిన పార్టీ, న్యాయపరమైన వివాదాలతో ఎన్నికలను నిలువరించాలని చూడటం విడ్డూరంగా ఉందని అన్నారు.

సుప్రీంకోర్టు పట్ల తమకు అత్యంత గౌరవం ఉందని, న్యాయస్థానం ఇచ్చే తీర్పులకు టీడీపీ కట్టుబడి ఉంటుందని పల్లా శ్రీనివాసరావు స్పష్టం చేశారు. ఎన్నికల గడువు పొడిగింపుపై నిర్ణయం తీసుకోవాల్సింది రాష్ట్ర ఎన్నికల సంఘమేనని, ఈ విషయంలో తమ పార్టీకి ఎలాంటి సంబంధం లేదని తేల్చిచెప్పారు. న్యాయస్థానాల ఆదేశాలపై అనవసర రాజకీయాలు చేయడం తగదన్నారు.

ఉమ్మడి కడప జిల్లాలో స్థానిక ఎన్నికలను అడ్డుకునే ప్రయత్నాలు జరుగుతాయని తాము ముందే ఊహించామని పల్లా పేర్కొన్నారు. రాజంపేట, ప్రొద్దుటూరు, పులివెందుల, కమలాపురం సహా పలు ప్రాంతాల్లో వైసీపీ ముఠాలు ఉద్రిక్తతలు సృష్టిస్తున్నాయని ఆరోపించారు. బెంగళూరులో కూర్చొని వ్యూహాలు రచిస్తూ, ఇతర ప్రాంతాల నుంచి వ్యక్తులను రప్పించి అలజడులు సృష్టిస్తున్నారని విమర్శించారు. ఈ ఘటనలనే సాకుగా చూపి రాష్ట్రవ్యాప్తంగా విధ్వంసం జరుగుతోందని తప్పుడు ప్రచారం చేస్తున్నారని అన్నారు.

పులివెందులలో దశాబ్దాలుగా ఉన్న వైసీపీ ఆధిపత్యాన్ని ఎదుర్కొని టీడీపీ శ్రేణులు నిలబడ్డాయని, ఇప్పుడు అక్కడ ప్రజలు స్వేచ్ఛగా ఓటు వేసే పరిస్థితి రావడం వైసీపీ నేతలకు ఆందోళన కలిగిస్తోందని వ్యాఖ్యానించారు. కేవలం ఎన్నికలే కాకుండా, మెగా డీఎస్సీ నియామకాలు, అమరావతి, పోలవరం వంటి అభివృద్ధి కార్యక్రమాలను అడ్డుకోవడం కూడా వైసీపీకి అలవాటుగా మారిందని పల్లా దుయ్యబట్టారు.

క్రిమినల్ కేసులు ఎదుర్కొంటున్న నేతలున్న పార్టీ ప్రజాస్వామ్యం గురించి మాట్లాడటం హాస్యాస్పదమని పల్లా ఎద్దేవా చేశారు. 2024 ఎన్నికల్లో ప్రజలు 11 స్థానాలకే పరిమితం చేసినా వైసీపీకి ఇంకా బుద్ధి రాలేదని విమర్శించారు. టీడీపీ శ్రేణులు అప్రమత్తంగా ఉంటూ, ప్రజాస్వామ్యబద్ధంగా వైసీపీ దౌర్జన్యాలను ఎదుర్కోవాలని పిలుపునిచ్చారు. ఎన్ని కుట్రలు పన్నినా ప్రజాతీర్పును ఎవరూ అడ్డుకోలేరని స్పష్టం చేశారు.